نئی دہلی: مرکزی وزیر خزانہ نرملا سیتارمن نے عام بجٹ 2024 پیش کر دیا ہے۔ یہ ساتویں بار ہے جب نرملا سیتا رمن کو بجٹ پیش کرنے کا موقع ملا ہے۔ مودی حکومت کا یہ 13واں بجٹ ہے۔ مرکزی کابینہ نے منگل کو قومی جمہوری اتحاد (این ڈی اے) حکومت کی تیسری مدت کے لئے پارلیمنٹ میں پہلا عام بجٹ پیش کرنے کی منظوری دے دی۔ عام بجٹ 2024-25 کو پارلیمنٹ کی کارروائی شروع ہونے سے پہلے وزیر اعظم نریندر مودی کی زیر صدارت کابینہ کی میٹنگ میں منظوری دی گئی۔ اس کے بعد وزیر خزانہ نرملا سیتا رمن نے لوک سبھا میں بجٹ پیش کر دیا۔ اس سے قبل سیتا رمن نے صدر دروپدی مرمو سے ملاقات کی تھی۔
وزیر خزانہ نرملا سیتارمن نے اپنی بجٹ تقریر میں متعدد اعلانات کئے اور بجٹ کو غریبوں، خواتین، نوجوانوں اور کسانوں پر توجہ دینے والا قرار دیا۔ بجٹ پیش کرتے ہوئے نرملا سیتا رمن نے کہا، ’’ہماری توجہ غریبوں، خواتین، نوجوانوں اور غذا فراہم کرنے والوں (کسانوں) پر ہے۔ ہندوستان کے عوام نے تیسری بار وزیر اعظم مودی کی قیادت والی این ڈی اے حکومت پر اپنے اعتماد کا اظہار کیا ہے۔ ساتھ ہی ہندوستان کی معیشت مشکل وقت میں بھی تیز رفتاری سے چل رہی ہے۔‘‘
بجٹ پیش کرتے ہوئے نرملا سیتا رمن نے کہا، ’’پردھان منتری غریب کلیان یوجنا میں 5 سال کی توسیع کی گئی ہے، جس کا فائدہ ملک کے 80 کروڑ لوگ لے رہے ہیں۔ ہماری حکومت کی پوری توجہ روزگار، ہنر اور نوجوانوں پر مرکوز ہے۔ اس وقت ملک میں افراط زر 3.1 فیصد پر ہے، تعلیم اور روزگار کے لیے 1.48 لاکھ کروڑ روپے خرچ کرنے کی تجویز ہے۔‘‘
طلباء کو 10 روپے تک کا قرض
سیتارمن نے کہا کہ بجٹ میں نوجوانوں پر خصوصی توجہ دی ہے۔ بجٹ میں طلباء کے لیے 10 روپے قرضے کی تجویز دی گئی ہے۔ حکومت نے اعلیٰ تعلیم کے لیے 10 لاکھ روپے تک کے قرضوں کے لیے مالی امداد کا اعلان کیا ہے۔ وزیر خزانہ نے اعلان کیا کہ افرادی قوت میں خواتین کی شمولیت کو بڑھانا اولین ترجیح ہوگی۔
زراعت میں ڈیجیٹل انفراسٹرکچر کو مضبوط کریں گے۔
وزیر خزانہ سیتا رمن نے کہا، ’’زراعت، روزگار، سماجی انصاف ہماری حکومت کی ترجیحات ہیں۔ ہماری ترجیحات میں شہری ترقی، توانائی کی حفاظت بھی شامل ہے۔ زراعت کے شعبے کی پیداواری صلاحیت اور کارکردگی ترجیح ہے۔ ہم دالوں اور تیل کے بیجوں کی پیداوار اور ذخیرہ اندوزی میں اضافہ کریں گے۔ اور 30 فصلوں کی 109 قسمیں جلد دستیاب ہوں گی۔ ہمارا مقصد تیل کے بیجوں میں ڈیجیٹل انفراسٹرکچر کو مضبوط کرنا ہے تاکہ 400 اضلاع میں پیداواری صلاحیت میں اضافہ کیا جا سکے۔‘‘
سیاحت کے شعبے میں نجی سرمایہ کاری
نرملا سیتا رمن نے کہا کہ سیاحت کے شعبے میں غیر ملکی سرمایہ کاری کو راغب کرنے کے لیے متعلقہ اصولوں اور قوانین کے تحت خودکار راستے کے تحت سیاحت اور مہمان نوازی کی صنعت میں 100 فیصد براہ راست غیر ملکی سرمایہ کاری (ایف ڈی آئی) کی اجازت دی گئی ہے۔
بجٹ میں 9 شعبوں پر توجہ دی گئی:
وزیر خزانہ نے کہا کہ موجودہ بجٹ کو ترجیحات میں یاد رکھا جائے گا۔ وزیر خزانہ نے کہا کہ بجٹ میں 9 شعبوں پر توجہ دی گئی جو اس طرح ہیں: زراعت میں پیداوری اور لچک، ملازمت اور مہارت، جامع انسانی وسائل کی ترقی اور سماجی انصاف، مینوفیکچرنگ اور خدمات، شہری ترقی توانائی کی حفاظت، بنیادی ڈھانچہ، جدت، تحقیق اور ترقی، اگلی نسل کی بہتری۔
نرملا سیتا رمن نے 2024-25 کا مکمل بجٹ پیش کرنے سے پہلے صدر دروپدی مرمو سے ملاقات کی۔ روایت کے مطابق وزیر خزانہ نے پارلیمنٹ جانے سے پہلے راشٹرپتی بھون میں صدر جمہوریہ سے ملاقات کی۔ مرکزی بجٹ پیش کرنے کے لیے پارلیمنٹ کے لیے روانہ ہونے سے پہلے صدر مرمو نے کوئی بھی نیک کام کرنے سے پہلے روایت کے مطابق سیتارمن کو دہی اور چینی کھلائی۔ اس کے بعد بجٹ کی منظوری کے لیے مرکزی کابینہ کا اجلاس ہوا۔
سیتارمن کے اس بجٹ سے لوگوں کی بہت سی امیدیں وابستہ ہیں۔ 2019 میں شروع ہونے والی روایت کو جاری رکھتے ہوئے سیتارمن نے ‘بہی کھاتہ’ طرز کے بیگ میں لپٹے ڈیجیٹل ٹیبلٹ کے ساتھ اپنی بجٹ تقریر پیش کی۔ انہوں نے موجودہ مالی سال 2024-25 کا بجٹ بھی پیپر لیس فارمیٹ میں پیش کیا۔
